مقتطفات لـ بدر بن عبد المحسن

[فيصل عجاج الكره]

إنه

((( البــــدر )))

الأمير الشاعر بدر بن عبد المحسن


ليست سوى مقتطفات لأجمل ما قرأته




((ارقام ))


في آخر الصفحه .. يسار ..
خبر صغير .. حادث قطار .. مات أربعة ..
مكتوب في السطر الأخير ..
باقي التفاصيل .. في الصفحة العشرين ..
على الثرى .. وبين الورق ..
أجسادهم امقطعة ..
الأربعة .. لجل المساحة ماتشيل ..
وفي باقي الصفحة صور ..
فنان .. وحصان .. و كور ..
وابحث عن الخبر الحزين ..
في نهاية الصفحه يمين ..
حادث قطار ..
ماتوا ثلاثة وطفل ..
وباختصار .. شديد .. شديد ..
كان القطار .. هو الوحيد ..
اللي بأسم ..
بلا ملا مح .. أو أسامي ..
ليه كلنا نموت ..
ليه نهمل الجثه ..
ونتذكر التابوت ..
لأقدامنا صوت ..
من يسمعه ..
من يسمع الأقدام..
هم مروا من تحت الكلام..
الأربعة ..
وصاروا أرقام .. أرقام ..

أنا رقم .. اصقه ضرير ..
المشكلة .. مثلي كثير..
يجمعنا حب الهاويه ..
احلامنا .. انا نصير..
وقاماتنا متساويه..
نركض على ورق الحياه ..
لين ننمحي ..
المشكله مانستحي ..
إنا نمرّ ..
ماشافنا انسان ..
ولا سمعنا انسان ..
اكتبني يالنسيان ..
انا رقم ..





((الا الهوى ))



ابعتذر ... عن كل شيء ...
إلا الهوى .. ما للهوى عندي عذر ..
ابعتذر .. عن أي شي ..
إلا الجراح .. ما للجراح إلا الصبر ..
إن ضايقك اني على بابك أمرّ ...
ليلة ألم ... واني على دربك مشيت عمري وأنا
قلبي القدم ...
ابعتذر ... ابعتذر ... كلي ندم ...
عن كل شيء ... إلا الهوى ...
ما للهوى عندي عذر ...
ا تصدقي ... ما اخترت أنا أحبك ...
ما احدٍ يحب اللي يبي ...
سكنتي جروحي غصب ...
ياحبي المرّ ... العذب ...
ليت الهوى وانتي ... كذب ...
كان اعتذر لك عن هواي ...
ما أقول أنا ... كوني معاي ...
ان ضايقك اني على بابك أمرّ ...
ليلة ألم ...
واني على دربك مشيت عمري وأنا ...
قلبي القدم ...
ابعتذر ... ابعتذر ... كلي ندم ...
عن كل شيء ... إلا الهوى ...
ما للهوى عندي عذر ...
الله كريم .. حبك ... يكون ...
همي القديم ...
وجرحي القديم ...
والله عليم ... يا أحلى العيون ...
ان الفراق ... جزا الفراق ...
ابوعدك ... كان الطريق بيبعدك ...
بامشي الطريق ...
وكان الجحود بيسعدك ...
مالي رفيق ...
ابجمع أوراق السنين ... وأودعك ...
كان الفراق اللي تبين ... الله معك ...





(( البتول ))


كـل أرضٍ تشيلك يـا ثـقيـل الحمــول =وكل وقتٍ كريمٍ بالرضا والزعل
وين مـارحت تلقى لك حبيب وعـذول =وين ما كنت تلقى مثل ياسـك..أمل
ياطـريق الترجي والوله والـنـحول =والله إني مـشيـتـك... لـين حد الـثـمل
مالقيت فوصولي لغـير قــبري وصول =ولا عـرفت فـحياتي مثل عرفي الجهـل
لا تظـن المـسافر مـن يسوق الـرحول =مـن وقف دون حلمه عاجزٍ ما رحـل
وما لمخلوق منجا في الحذر والجـفول =مـا تـصيب السـهام ولا يـطـيـش الاجــل
الـلـيـالي خـــــوات.. مــير مـنـهـي البـتــــول =والحــوادث عـشــــايـر مـير ويــن الفـحـل
ليلةٍ لـك .. وليله بـالفـــرح مــا تـطـــــــول =ولـيـلـةٍ مـن شــهــدهــا ذب راس الــجبـــل
أتذكّر في عين الشمس طفــلٍ خـجـــول =شـالـتـه فــي هــدبــهــا وقـت لــين إشـتـعــل
أعجب الناس وهجـــه بالجــدل والفـضــــول =ما دروا عن (جمـــال الجـرح) لــين إنـدمــل
والله اني كتـبـتـه في العطــش والذبـــــول =لــين غــصــنــه تــعـــدل بـالــورق وإعـتــدل
والله إنـي كــتـبـتـه لــــين قـــــــال الجـهــــــول =والله إنـي كـتـبـتـه وانــتــشـى واحـتـفــل
ما أتفه الشعر كانه هالحكي اللي نقول =لا تـعـدى الــمــــديــح ولا تـعــدى الـغـزل
إن لثمت الزهــــــور وصــــاحبتني الحقــــول =مـاهقيت ان صافـي الشهـد عيب النحل
مابقى في ضلـوعي كود ريـح مـعـمــــول =وثــــوب شـاشٍ عـليه مــن النــدامـه وحــل
ألـتـفـت للـطــــريــــق ومــا عـــبر مــنــه زول =فـــي جـفــوني تـزاحم عبرتي والـوجــل
طـلـت يالعـمر والا قــلــعـتـك لا تـطـــــــول =طــاولــتـنــا الـلـيــالي بالـســــهــر والــمــــلـل
إن تـعـبـنــــا نـــحـب ولا لــقــيــنــا قـبـــــــــول =مـا تــسـر الامـــانـي .. ولا يـفيـد الـعــذل
لكن .. الله كريم وكل همٍ يزول =مـا على الله بعيد .. ولا جـفـاك الـمـحـل
كـل أرضٍ تشيلك .. يـا ثـقيـل الحمــول =وكل وقتٍ كريمٍ بالرضا والزعل




(( اترامى ))

اترامى
هذي عاداتي
في كل العمر مره .. اترامى ..
وصدقيني في حياتي ..
ما هقيت اني عقاب .. ولا يمامه ..
انما لعيونك إنتي ..
طرت لاجمل إبتسامة
لين قلتي وين جناحانك..؟
وين جنحاني .. ؟! وطحت ..
طحت من أعلى غمامه..
أنا ما ادري مريت بين أصابعك رمل ..
او على خصلات شعرك .. ماء ..
كانت غبارٍ وظلما
وكنت أطيح ..
وهذا آخر مااتذكر ..
وين ظنك با تجرح .. واتكسر
فـ أي رمل .. أي صخر .. او عدامه ..
ما هقيت أني عقاب ولا يمامه
انما لعيونك إنتي ..
طرت لاجمل إبتسامه
وما ابي غير السلامه
من الجروح .. ومن التداوي
كيف أمس الأرض .. واطيح متساوي
انا صدقت الصغار .. يوم قالوا :
من يحب القمرا يرحل .. لآخر أرض
وينتظر تالي نهار ..
ولا ظهر منها شبر ..
عانق القمرا .. طمر ..
كيف ضاعت كل أحلامي هقاوي ..
يوم قلتي : وين جنحانك ..
وين جنحاني .. ؟! وطحت ..
طحت من أعلى غمامه..



((الرسايل ))

وليله كانت الفرقا
و قالت لي .. فـ أمــان الله
و ليله ذكرها يبقى
على جرحي .. و لا انساه
و جت تاخذ رسايلها ..
و خصله من جدايلها
و تديني جوباتي
بقايا عمر بسماتي
و قالت لي .. فـ أمــان الله

في ليله كنها الليله عرفتك بسمتي و فجري
و ليله زي ذي الليله و هبتك في الأمل عمري
و يا ليت البسمه ما كانت ولا الاحساس
وياليت الدنيا خانتني و كل الناس
و لا خنتي هواي انتي
و لا قلتي .. فـ أمـان الله

لا تردين الرسايل ويش اسوي بالورق
و كل معنا للمحبه ذاب فيها و احترق
لو تركتيني في ليله بسمتك عند الرحيل
دمعة العين الكحيله عذرها الواهي دليل
و ليله كانت الفرقا
و قالت لي فـ امان الله





(( السراب ))


قال السراب وقلت ظامي لسـرابه= قال الهلاك وقلت لعيون الاحباب

يا لايمي في حب متـرف شـبابه =الموت حق ولاتبـرق بالاسباب

كانه ذبحني صـاحبي من عـذابه= ماابي لدمي يا هل اللـوم طلاب

الـجادل اللي فيه زيـن ومهابه= يفز له قلبٍ .. وتخضع له أرقاب

في حجر عينة لي غديـر وسحابه =وفي وسط قلبي له تناهيت وعتاب

إن قلت أحبه يكفي القلب مـابه =وان قلت أنا مابيه ..باصير كذاب



المسافر


لا تلوح للمسافر ..
المسافر راح ..
ولا تنادي للمسافر
المسافر راح ..
يا ضياع أصواتنا .. في المدى والريح
القطار وفاتنا ..
والمسافر راح ..

يالله يا قلبي تعبنا من الوقوف ..
ما بقى بالليل نجمة ولا طيوف ..
ذبلت أنوار الشوارع .. وإنطفى ضيّ الحروف
يالله يا قلبي سرينا .. ضاقت الدنيا علينا
القطار وفاتنا ..
والمسافر راح ..

مادري باكر هالمدينة وشتكون ..
النهار والورد الأصفر والغصون ..
هذا وجهك يالمسافر لما كانت لي عيون ..
وينها عيوني حبيبي ..
سافرت مثلك حبيبي ..
القطار وفاتنا ..
والمسافر راح ..




(( الوله ))


يطري عليه الوله .. وأطري على باله =يامرحبا لاضوى خلي على بابي
هجيت حدب الضلوع ونوخ جماله =لاجله بكت دمعتي ولأجله ضحك نابي
وكل ما ضحك لي لمحت النور في آماله =والى تجهم سترت السقم بثيابي
وكل ما شكى من عنى همه وغرباله =أقول لعل به جرحٍ من أسبابي
طال الحكي ما لقيت الوصل بوصاله =لاني حبيبه ولا هو أقرب اصحابي
ناديت طاري المحبه مالنا وماله =بالحيل أنا وانت ربع وكننا أغرابي
يا زين كانك حزين .. فحالتي حاله =بكفيك همك وأنا بصبر على مابي
لو الشجر له نصيب فـ بارد ظلاله =ماحرق القيض جفني وأنت فـ أهدابي



غرفه


يطيح جفن الليل واهز كتفه =نجمٍ يشع وباقي الليل مطفي
واحاكي الجدران عن وصف غرفه =ماتشبه الجدران ويطول وصفي
وتملني الجدران واظهر لشرفه =تحت السما واسكر الباب خلفي
ريحٍ تهب وتسكن العظم رجفه =وتموت ريح وتسكن اوراق نزفي
على الروابي تهطل دموع وطفه =وتصب لمع بروقها وسط طرفي
ياطاري الغدران والعمر رشفه =مع قلها ياليتها يوم تصفي
الحب واجد مير الاقدار صلفه =والأرض واجد لكن الحلم منفى
واللي اعرفه راح ماعاد اعرفه =ولاظن يذكرني الى أقبلت مقفي
ماهو حبيبي مورد القلب حتفه =ولا هو حبيبي يفرح بوقت ضعفي
مر ثمر هالليل وأمر قطفه =يالحنظل اللي قمت اذوقه بكفي
متى الشوارع تجمع اثنين صدفه =لا صار شباك المواعيد مجفي
يابنت تو الليل ماراح نصفه =وياليل بعض اللي مضى منك يكفي




((الهوى لو تمنى ))



الهوى لو تمنى =سلوته مستحيله
واعذاب المعنى =كان روحه عليله
لا بغى الوصل منا =من ضافي الجديله
عود موزٍ .. تثنى =وش رماني بسبيله
سهم عينه رمنّى= والرموش الطويله
خبروا الزين عنّى= لي نشد عن قتيله
كل خلٍ .. تهنى =في الهوى مع خليله
فاتنا السعد حنا= يوم نفسه بخيله





((الماضي الحاضر ))


صوتٍ شبيه الريح .. مشققٍ بأعواد شيح
مرتّق بالدم .. معتّق بالهم زافر
صوتٍ مثل خضر العروق اللي على ظهر الكفوف المبطيه نافر
صوتٍ ذبيح .. يصرخ يصيح .. إبلك خذوه القوم
بين الفزع والنوم ..
أسرجت مهري ألف ..
وسلّيت سيفي ألف ..
وظهرت تحت الشلف ..
ماكان في الشارع غير الرصيف والفجر ..
وبواب جيراني من هالمدى راجع ..
يحمل رغيفٍ حار .. زاد لثلاث صغار..
للمدرسه صحيوا ولبسوا مرايلهم ..
سنين سنين .. هالصوت الجارح الزاجر..
يصيح بي وينك.. قطفت بساتينك ..
وابلك خذته القوم.. خذته القوم هالابل..
أفـّز وفي أنفي ..عـجاجة الغـاره ..
وأصحى وفي كفي ساعه ونظاره ..
مالي إبل أرجـوك مـالي نخيل .. لانصل ولا حـافر..
تعبت من صوت العروق المبطيه.. ومن صمتي الفاجر..
وأنا أخر الفرّيس ظنك ..
أنـا أخـر الفرّيـس ..
حسبك ياحادي العيس ..
هذا الزمن عاري ..لاردن ولا جوخه ..
يصهل مهر راكان ..
وينادي ابن مهيد ..
يوقف شعر هالبيد ..
هذا الزمن أصمخ .. مايسمع شيوخه..
شد الرحال .. سافر ..
دوّر ياحادي العيس .. روض وزهر ماديس
ولذنوبنا.. لذنوبنا غافر
وداع يا خضر العروق اللي على ظهر الكفوف المبطيه
يالماضي الحاضر ..

[فيصل خالد العريف]

,,


المشكله مانستحي ..
إنا نمرّ ..
ماشافنا انسان ..
ولا سمعنا انسان ..
اكتبني يالنسيان ..
انا رقم ..



كنت توني بروح انام

قلت خل اقراء ابيات من القصايد


شفت نفسي كل قصيده اقراها اقل شي مرتين وأعيش معاها



فعلا نقل رائع لشاعر رائع

كل قصيده اجمل من اللي قبلها



وفيهم كم قصيده اكثر من رائعه

أول مره اقراها للامير بدر بن عبد المحسن


فيصل رائع في كل مواضيعك


تقبل مروري








,,

[زيد خلف الدهام]

قصائد مختارة بعناية ...

فيصل كما قال فيصل انت رائع في مواضيعك ..

شكرا .. ونريد منك الاستمرار بالتألق ..

[عبداللطيف حمدان الدهام]

فيصل مبدع

ما قصرت
بس كان ودي لو كل يوم تنزل قصيده

عشان ننتظر ثاني يوم على احر من الجمر

يعطيك العافيه

[خالد حمدان الدهام]

...


فيصل ..

الأختيار فن .


وأنت والله مبدع بأختيارك ..


يااااااااااااااه

أتراااااااامى
.
.
.
.
يوم قلتي : وين جنحانك ..
وين جنحاني .. ؟! وطحت ..
طحت من أعلى غمامه..

رووووووووعه


شكرا فيصل
ذكرتني بأحساس
خفت اني نسيته

شكرا ألف

أخوك : خالد

[فيصل عجاج الكره]

فيصل العريف ... زيد الدهام


شاكر تفاعلكم و أسعدني رضاكم عن الإختيار



عبد اللطيف الحمدان

لا أخفيك أني فكرت في ذلك و لكن من كثر قصائد البدر الموجودة عندي نزلت 5 % فقط

و إن شاء الله أضيف الباقي تباعاً ليكون ديوان لهذا المبدع




خالد الحمدان


إنتقيت الأجمل و لا يفوتني الإشارة إلى إبداع الفنان خالد الشيخ في صياغة هذه القصيدة لحناً

[محمد الصالح الدهام]

الزين مايختار إلا الزين مقتطفات روعه من كاتب أروع

مادري باكر هالمدينة وشتكون ..
النهار والورد الأصفر والغصون ..
هذا وجهك يالمسافر لما كانت لي عيون ..
وينها عيوني حبيبي ..
سافرت مثلك حبيبي ..
القطار وفاتنا ..
والمسافر راح

يعطيك العافية

[عبدالرحمن حمدان الدهام]

انه البدر ,,

لا يكتمل القصيد والشعر الا بتواجد البدر ..

ومميز يا فيصل باختيارك لشاعر مميز وقصائد مميزه ,,

واسمحلي اشاركك ببعض ابيات من قصيده من قصايد الشاعر الامير بدر بن عبدالمحسن ..



ناديتي خانتني السنين اللي مضت راحت ,,
ناديت وماكن السنين اللي مضت راحت ,,
كنا افترقنا البارحه ,,
والبارحه صارت عمر ,,
ليله أبد عيت تمر ..
ياجمرة الشوق الخفي ,,
نسيت انا نسيت أنا
وجرحك وفي..
يتذكر الحلم الصغير ..
وجدار من طين وحصير ..وللابداع بقيه ..

شكرا البدر
كل الشكر فيصل ...

[عبدالكريم حمدان الدهام]

من كل بستان ورده


ا تصدقي ... ما اخترت أنا أحبك ...
ما احدٍ يحب اللي يبي ...


والله إني مـشيـتـك... لـين حد الـثـمل
مالقيت فوصولي لغـير قــبري وصول



انما لعيونك إنتي ..
طرت لاجمل إبتسامة
لين قلتي وين جناحانك..؟
وين جنحاني .. ؟! وطحت ..


هذا وجهك يالمسافر لما كانت لي عيون ..
وينها عيوني حبيبي ..
سافرت مثلك حبيبي <<<



لاجله بكت دمعتي ولأجله ضحك نابي....
لاجله بكت دمعتي ولأجله ضحك نابي....



متى الشوارع تجمع اثنين صدفه
لا صار شباك المواعيد مجفي
يابنت تو الليل ماراح نصفه
وياليل بعض اللي مضى منك يكفي





ننتظر باقي الابداع يا فيصل
اتمنى ان لا تتركنى طويلا عن هذه الابداعات
لو كل يوم قصديه
ننتظرك مع البدر

[فيصل عجاج الكره]

(( القاع والمسافة ))




انا احبك مابها زيف وخداع =رغم الذي نخفيه .. واللي نخافه
أودعك .. ليت الألم لحظة اوداع =إلى مضت .. ننسى الألم والحسافه
وأفارقك.. لوالسفر .. يم وشراع =وبعد الفراق .. اللي نوده نعافه
لا صار مافي البعد راحه لملتاع =بالله وش نفع التعب والكلافه
من الجفا والصد .. يكفيني اذراع =لا جف نهر الحب ماتت اضفافه
املي يدك رمل وترى هذي القاع =ومدي النظر .. تدرين وش هي المسافه





(( المرايا ))


كلنا عشاق لكن ..
إنتي لا ما انتي معايا ..
لما تجمعنا الأماكن
تاخذك مني المرايا ..
انتي مشغوله بروحك
ما ملك عقلك وروحك
لا أنا.. ولا سوايا
اعطي ظهرك للمرايا .. وشوفي غيرك
اظهري من ليل كحلك ومن أساورك وحريرك
افتحي الشباك مره .. شوفي الناس والشوارع
وش كثر هالغربه مره .. للي وسط الزحمه ضايع
انتي مشغوله بروحك .. ما ملك عقلك وروحك
لا أنا.. ولا سوايا
كلنا عشاق لكن
كل واحد له حكايه ..
كلناعشاق لكن
كلنا نحبك.. نحبك
وأنتي جرحك في ساكن .. وأنا جرحي برا قلبك
أمشي لو نصف المسافة .. وقفي بينك وبيني
أكسري كل المرايا .. أنتي أجمل وسط عيني
يا للي مشغولة بروحك من خذا قلبك وروحك
هو أنا .. ولا سوايا
كلنا عشاق لكن
كل واحد له حكاية





((الندم ))



خل الندم .. يا مضيع الود يسقيك =كاس الهوان .. وذل نفسٍ تمنتك
وخل الهوى يملا بعذابه لياليك =مثلي .. وأنا ساهر جروحي بسبتك
شْف ما بقى لك من غلا كود طاريك =واتلى الذكر للي مضى من محبتك
انا الذي بجروح روحي اداويك =وبشفاي اجفف دمعةٍ فوق وجنتك
كان الدلال .. وزينك اليوم مطغيك =ترى الجفا كدّر على النفس لذتك
وكأنك قصدت تذلني في تماديك =روح المعزة عن ردى القصد ردتك
ياصاحبيى .. ما بعت ودّي وأبا أعطيك =غالي الوفا لو عاد ترجع مودتك

[خالد بن قدر بن مظهور]

مقتطفااااااااات رااائعه


ومشكوووور

[فيصل عجاج الكره]

شكراً لكل من مر من هنا



و لكم رائعة

.
.

لا تعلمني




ليه أحس إني وأنا اشوفك حزين=وقلبي الليلـه بهمـي ممتلـي
كانها الفرقى طلبتـك حاجتيـن=لا تعلمنـي ولا تكـذب علـيّ
خلني ما بين شكـي واليقيـن=السكوت رضاي عنك وزعلـي
باكر اللـي خافـيٍ لازم يبيـن=والوعد بلقى مكانك بـه خلـي
وانتظر لـي ليلـة او ليلتيـن=لين ما يقفي السحاب وينجلـي
ولا طويت الياس بذرف دمعتين=للهوى الغالي وبـا وادع هلـي
صاحبي بموت من كثر الحنيـن=خلنـي بختـار لحظـة مقتلـي

[عبدالكريم حمدان الدهام]

صاحبي بموت من كثر الحنيـن
خلني بختـار لحظـة مقتلـي



فيصل ترانا حنينا للبدر وقصايده اللي منك ..


لا تتأخر اكثر ..

انا بانتظارك مع البدر ..

[فيصل عجاج الكره]

إستلم و لا غنى عن فزعتكم




لا تجرحيني .. جرحك العام ما طاب= داوي بحنانك ما مضى .. واجرحيني
ياللي حنانك نظرة بين الأهداب =ردي علي بعض العزا .. ناظريني
خافي على قلبٍ يحبك إليا ذاب= ذاب الهوى في خفقته .. والحنيني
لولاك ما زار القمر ليل الأحباب=ولا لوحت شمس المحبه جبيني
ولولاك .. ما يلفي على الدّار غياب= ولا تبكي اللي فارق الدار عيني
في غيبتك كل الملا عندي اغراب=ما أحدٍ أبي قربه .. ولا أحدٍ يبيني
لا ياغلا كل القرابه والأصحاب= ضاع العدل في الناس لو تظلميني