تصدق والا ما تصدق

[عبدالله حابس شتيوي العيد]

تصدق وإلا ماتصدق .... أنا عاجز عن التفكير =تعال وشوف في عينك غيابك وش عمل فيني
* * *
حبيبي مابقى عندي صبر يتحمل التأخير =رحلت... وعقبك الدنيا غلاها طاح من عيني
* * *
أجاوب اللي يسألني عن أخباري وأقول بخير =وأنا لاخير بغيابك ولا حاجه تهنيني
* * *
على طاريك كل لحظه ولأحتاج للتذكير =حريص القلب ماينسى عيونك لاتوصيني
* * *
محد يقدر يعوضني لأنك في عيوني غير =ومهما شفت أنا الفرحه بدونك ماتسليني
* * *
أنا حبيتك وهالغلطه حبيبي مالها تبرير =علاقة حب مجنونة مابين أحزاني وبيني
* * *
وكيف الحال وشلوني جواب مايبي تفسير =بدونك أنت ماتضحك حياتي وترمش سنيني
* * *
مثل شاعر عجز يوصف شعوره وخانه التعبير =أنا ضايع ولاأدري من فراقك أنا ويني
* * *
مثل طير كسر بعدك جناحه وماقدرت أطير =أحاول أبتسم وأنسى ولكن وش ينسيني
* * *
أشوفك في صباحي إنت معنى ياصباح الخير =وأشوفك في مسائي حلم وردي لاتصحيني
* * *
تصدق السهر يرسم عيوني ويتقن التصوير =ويشق النور في صفحة حياتي وماألاقيني
* * *
أنام وشلون ومشكلتي عجزت ألقى لها تدبير =طلبت النوم لحظاتة وعيا النوم يعطيني
* * *
تغير وجهي من أول غيابك وإبتدى التأثير =حبيبي من التعب كافي خذيت اللي يكفيني
* * *
ياأغلى من رحل عني ياكل الحب والتقدير =تعال كان لي عندك معزه وكان تغليني
* * *
تعال إن كنت تعشقني وإذا فعلا تبي لي خير =تعال ومد لي كف الوصل وآمد كفيني
* * *
وإذا كان الجفا واجب بدى من قلبي التقصير =أبيك الحين ترجع لي ولا ترجع تخليني
* * *
أنا ماأقول اللي صار فيني ماهقيته يصير =لأني كنت متأكد بأن البعد ينهيني